Paindikan sane Ngangobin 7: Kuasan Hyang Yesus Ngulah Buta Kala
(Lukas 9:37-45)
Hyang Yesus Nyegerin Anak sane Karangsukin Buta Kala
7
37 Benjang semengane,
tatkala Hyang Yesus sareng makatiga sisian Idane tedun saking gununge,
anake akeh mabered ngrauhin Ida.
38 Jeg saget,
saking anake akeh punika wenten anak lanang sane majeritan matur sapuniki,
“Guru,
tulungin ja pianak titiange,
krana ipun pianak titiange sane tunggal!
39 Ipun karangsukin buta kala.
Ritatkala karangsukin,
pramangkin ipun kaik-kaik lan awak ipune kejet-kejet kantos bibihnyane ngwetuang lomok.
Buta kalane punika setata nyiksa ipun lan nenten ja nyak magedi.
40 Titiang sampun nunas mangda para sisian Gurune ngulah buta kalane punika,
nanging nenten mresidayang.”
41 Hyang Yesus ngandika ring anake akeh sapuniki,
“Wih ragane makejang ane jaat!
Kanti buin pidan tiang musti sabar tekening ragane?
Kanti buin pidan tiang musti idup ajak ragane,
wih anake ane nu tusing pracaya?”
Raris Hyang Yesus ngandika ring bapan anake punika sapuniki,
“Bakta ja pianak ragane mriki!”
42 Risedek anak alit punika mamargi nuju Hyang Yesus,
buta kalane mantigang anake alit punika lan ngranayang ipun kejet-kejet.
Nanging Hyang Yesus mrentahang buta kalane pesu,
kantos anake alit punika seger.
Raris anake alit punika kaserahang ring bapannyane.
43 Anake sami sane wenten irika pada angob nyaksiang kuasan Sang Hyang Pengardi sane kalintang ageng.
Hyang Yesus Nyambatang Malih Indik Ida Jagi Kapademang
Yadiastun anake sami pada angob nyaksiang saluirin paindikan sane kalaksanayang olih Hyang Yesus, Ida ngandika ring para sisian Idane sapuniki,
44 “Dingehang tur eda ja engsap tekening pengandikan Tiange ene:
Tiang,
Sang Putraning Manusa,
bakal kaserahang sid para penguasa Yahudine.”
45 Nanging para sisian Hyang Yesuse nenten ja ngresep napi sane kanikayang olih Ida,
krana artin pengajahan Idane mengkeb saking ipun sami.
Yadiastun asapunika,
ipun jejeh nakenang artin pengandikan Hyang Yesuse.